مـلهـمي يـاليـل لـو تسمح تعـال
ضمني تعبان مـن شمس وسفر



ولمني فـي حضنك الدافئ ليال
ودي أتـناثر عـلـى صـدرك شعر



جيت لك شاعر ندب حظه ومال
والمشـاعـر داخله صـارت جـمر



جيت لك شاعر دفن جرحه ونال
مـن متاهات الزمـن ضيق وكـدر



شـاعرك ياليـل لو سافـر مـحـال
يبتـعد عـنّـك ولـو طـال السـفـر



شاعرك ياليـل لاجــاء لـه مجال
فــي جنونه عقـل وأفكـاره بكر



قلبـه المـجـروح ظلـمـآ لا يــزال
لشـريــط الذكــريات أوفـى قبر



الصدـر مخنوق وهمومه جـبـال
وأصدق العبرات وسطه تحتضر



يرسـم آماله على مـرسى خيال
وكل صبح أحلى الأماني تنتحر



ملهمـي يـا ليـل أنـا راحـل تعال
ضمني قبل أرتحل شمس وسفر



بس قبل أودّعـك عـنـدي سؤال؟
وش يفيد الصمت لامات الصبر؟