منتديات عبق الياسمين - عرض مشاركة واحدة

#1 10-05-2018, 01:55 AM

اللي قال ان الرجالة ملايكة ...
اكيد غشيم ...
دول يابا ...
معجونين بمية العفاريت ...
لا بيعجبهم العجب ولا الأدب ولا الرفيع ولا التخين ...
تشوف الواحد فيهم متعرفش تفَرق بين وشه وقفاه ...
قصير مكعبر مدور والكرش ساحبه وراه ...
نظره شيش بيش وسبحان الله ...
متأنجش بفلقة قمر منور حتة بسبوسة تهبل الاحساس وتشعلل الحياة ...
وهو جلف مصور متعرفلوش مشية ولا قاعدة ولاكلمة ولامنظر ...
كله علي بعضه جلياط ملقاط فلوس مش اكتر ...
ده غير الافندي اللي عامللي فانوس وماشي يدي في الحب دروس وهو في بيتهم متعور ...
ولا البيه اللي ساكن في الروف نازل بصبصة بنضارة الكسوف وأخر الليل يترمي جنبها زي الخروف ...
ولا صاحبنا المزجنجي لو دماغه عليت والصنف فوق عملها ليلة وألف ليلة وليلة بيدَور ع النشوق ...
دول غير عواجيز الغبرة المتصابين شباب كل عصر ...
ولا اللي عداه القطر وركب في السبنسة يوم مافاق نط يدور علي روحه في بت أد عمر احفاده يحرقها ...
ويشوف محطة تانية علي نفسه تلد ...
ولا بتوع منتصف العمر وشباب الامس بيبص في مرايتة بحسرة علي عنفوانه اللي اتهد ...
طب ليه يدفن حاله في اوضه سد وعلي اول سلمة يقع يندب ويقولك نزوة والنية غزوة عن غزوة تحب ...
ولا المزواج المقرش ياخدلك تلات نسوان وتمللي الرابعة تئلش تلخبطله الميزان ...
ولا البخيل الجبان اللي سافر عشان العيال شهر يبعت وتلاتة عيان والعيال بتضييع وهو بيجمع في شوال ...
ولا العدمان اللي راسه والف سيف يدخل دنيا اتلم علي بنت الحلال اللي بقت في يومين بين ايديه موميا ...
ولا المحب العطشان والجيب فاضي والهوس خرمان ضرب ورقة جرت ورقة ورا ورقة ودمر بنات فلان وعلان ...
الرجالة كانت زمان لما كانت الكلمة سيف والوعد فرمان ...
لما كانت القلوب صافية والحر نوره بيشع في كل مكان النهاردة ...
بقت خلطبيطة هنعرف مين من مين في دي زيطة ...
يلا عليه العوض ومنه العوض ...
البركة بقي في النسوان ...
فتحي عيسي

المصدر : منتديات عبق الياسمين

شكرا للقديرة عذبة المعاني
على هذة الهدية الغالية
سلمت يمينك وريشتك الذهبية

آخر تعديل فتحي عيسي يوم 10-05-2018 في 02:34 AM.

7 أعضاء قالوا شكراً لـ فتحي عيسي على المشاركة المفيدة:
, , , , , ,