منتديات عبق الياسمين - عرض مشاركة واحدة

#1 05-05-2018, 12:58 AM

اللي قال إن الستات ملايكة ...
أكيد عايش في كوكب تاني ...
دول يابا ...
في زعلهم عليهم تكشيرة ...
تقطع الخميرة م البيت ...
وفي ثانية تجيب القديمة والجديدة ...
واللي حوالين الغيط ...
ولو فتحو يابا ... يدوها ع الخامس ...
قطر معمر كابس ...
وياويلك لو لتيت ...
أو كترت ...
ولاا عليهم جيت ...
لا ليلة عدت ...
ولا صبحك لقيت ...
ولو ظبطتك يا امير ...
في بصة خايبة عبيطة ... ملهاش تفسير ...
خد عندك ... من المنئي كتير ...
وأيامك دخلت في الحيط ...
ولو حبيت تراضيها ...
تجبر بخاطرها ...
وعلي نفسك تزكيها ...
تركبها العظمة ...
وتدلدل رجليها ...
تحايلها تتشحتف ...
والدمعة حنفية ... والبوز شبرين ...
تتأسف تتبغدد ...
تسيبها وتمشي ...
تقولك علي فين ...
المصاريف خسعت ...
عاوزين سمنة وزيت ...
ولو رضيت عليك يا صغنن ...
شالتك في عينيها الجوز ...
وهشكتك ع الوشين ...
وحببتك في امك وابوك والعيلين ...
ومن الحنان سقيتك بإيديها الاتنين ...
النسوان علقة سخنة ...
الجدع اللي ياخدها مرة واحدة في عمره ...
لجسمه ينحس وميحوءش فيه بعدين ...
النسوان كانت زمان ...
فين القمرات ...
زينات صدقي ... ولا ماري منيب ...
ولا جمالات زايد ...
مش بتوع النهاردة ...
اللي محدش فيهم ...
شبه زوزو حمدي الحكيم
قال ملايكة قال ...
أكيد مفيش مرايات ...
فتحي عيسي

المصدر : منتديات عبق الياسمين

شكرا للقديرة عذبة المعاني
على هذة الهدية الغالية
سلمت يمينك وريشتك الذهبية

6 أعضاء قالوا شكراً لـ فتحي عيسي على المشاركة المفيدة:
, , , , ,