- وانت ما معاكش 800 جنيه يا أبو صلاح ؟
= لا طبعاً ، هجيبهم منين ؟ ده أنا داخل جمعية بـ 30 جنيه في الشهر عشان أدبر الـ 300 اللي معايا !
- يا سلام ! ليه هي ماهيتك كام ؟
= الصافي حوالي 250 جنيه
- في اليوم ؟
= انت هتهرج ؟
- ما هو أقل من كده ، تبقى انت اللي بتهرج يا دكتور !
= يووووووه ، انت باين عليك رايق ومشعشع الأنارخ !
- انت اللي صعبان عليا
= صعبان عليك !
- زنقت روحك في الكيميا ، وفضلت تدح في ماجستير ، وف دكتوراه وفضلت تهرش نافوخك بيد 2 كب أ 4 ، ورجل 6 ف 18 ....
= هههه ، رجل 6 فيها 18 ؟
- .... وآخرتها ، 250 جنيه في الشهر يا مهرج ؟!
= ولا ، بلاش قلة حَيا ، مش عشان عازمني ع الغدا .
- انت عارف المهرج بياخد كام في الليلة الواحدة يا دكتور ؟
= المسألة مش مسألة كام فيه اعتبارات أهم من كام يا قفل !
- هاهاها ، أنا برضه اللي قفل !
= طبعا ، لإنك بتحاول تعرف سعر كل شئ ، لكن ما بتعرفش قيمة أي شئ
- وقيمة الشئ ، ملهاش سعر ؟ ملهاش تمن ؟ فيه قيمة من غير ثمن ؟
= القيمة لا تقدر بتمن ، تقدر تقولي تمن الحق كام ؟ أو تمن الخير كام ؟
- وهو من الحق أو من الخير ان واحد زيك ، ما يحتكمش على 800 جنيه يدخل بيهم ابنه المدرسة !
فيلم الكيف - 1985