منتديات عبق الياسمين - عرض مشاركة واحدة

#1 16-02-2021, 02:18 PM

عديت في مرقب بيـن الشفـا العالـي
مرقاب غـي يـذل الطيـر مـن دونـه
تلقى لحرش المواطـي فيـه مدهالـي
عنهـا القنانيـص يلتاجـن بركـونـه
حب الحبيب صبـغ مـا عـاد ينجالـي
لو كل يوم بصافـي المـاء يغسلونـه
غض النهد وان وطا فـي وادي سالـي
ينبت نفـل والزبيـدي منـه يجنونـه
له مشيـة مـا مشاهـا اول ولا تالـي
واللـي خلافـه وقـدامـه يراعـونـه
يبكي عليه القصـر والمجلـس العالـي
حتـى الفناجيـل ودلالـه ينوحـونـه
يـا حافريـن القبـر خلـوه منـزالـي
واللـي علـى قـد راسـي لا تغطونـه
خلوني اشوف من سير ومن جـا لـي
واشوف غض النهد يمشي على هونـه
وسمعت عقب العصير صيـاح رجالـي
واثـره حـراج علـى قشـه يبيعونـه
لبس الحبيـب ثويـب بريسـم غالـي
لا لبسـه التـرف دق القـاع بردونـه
والله ماهمـنـي ولا ســرق حـالـي
ياكود ظبـي علـى الرامـي يحدونـه
عساه الى من رمي يخطي بـه الوالـي
عسى القنانيـص غيـري مايصيدونـه
وان كان غض النهد ( ياعيون ) ماجالي
فتـراي ميـت وقـبـري بتحفـرونـه
ياعيون ماترحم اللـي صابـه هبالـي
على غرير طويت اليـاس مـن دونـه

الشاعر عبد العزيز بن ناصر الهذيلي

المصدر : منتديات عبق الياسمين